Чеберлыкъя вожвылъяськонын вормон – уно нылашъёс понна  льӧль малпан. Быдэс зал тыр люкаськем калык пӧлын тужгес но чеберез, тужгес но устоез кинлэн,  бен, уз поты луэмез? Дано нимез утэмен артэ таӵе вожвылъяськонъёс мерлыкез но лулчеберетэз ӝутыны юртто.  Соин но 90-тӥ аръёсы  Россиын чеберлыкъя вожвылъяськонъёс тросгес но тросгес луыны кутскизы. 

1992-тӥ арын нырысетӥез чеберлыкъя вожвылъяськон Удмурт Элькунын но ортчиз. Нош 1995-тӥ арын  сцена вылэ удмурт нылъёс потӥзы. Соос понна «Чеберина» йӧскалык ӵошатскон радъямын вал. «Чеберина – 1995» вожвылъяськонэ пыриськыны туж трос нылъёс мылкыдзэс веразы. Но вормисез луиз Шаркан ёросысь нылаш – Наталья Кашина. Натальялэн со вакытлы нылпиосыз вал ини. Но анай луэмез нылкышнолы ӧз люкеты, бурдъятӥз гинэ, выль вормонъёс басьтыны мылкыдзэ ӝутӥз. «Чеберина» ужрадлы кутскон сётӥз радиожурналист Галина Германовна Кондратьева. Солэн кужмыз тырмиз вить конкурслы –  2006-тӥ арозь.

2010-тӥ арын вожвылъяськонэз нош ик улӟытыны малпазы. Озьы элькун ӵошатсконлэн нимыз но мукет сямен чузъяськиз – со «Чеберай» луиз. Та вакытысен ужрадэз радъяны басьтӥське удмурт лулчеберетъя «Дэмен» огазеяськон, Ураськин Андрей Иванович кивалтэм улсын. Вожвылъяськонэз кык арлы одӥг пол ортчытъяны малпазы. 2010-тӥ арын конкурслэн мукет воштиськонъёсыз но луизы, со улоскуспо луиз. Та арын ӵошатсконэ 12 удмурт нылашъёс пыриськизы. Ижкаре соос Удмуртиысь гинэ ӧвӧл, Татарстанысь но, Пермь улосысь но вуизы. Нылъёс удмурт сям-йылолъёсты тодэмзэс возьматӥзы, кырӟазы, эктӥзы, пыласькон дӥсен сцена вылэ потазы. Пусйыны кулэ, вожвылъяськонлэн нырысетӥ этапез ёросъёсын ортчиз, собере гинэ нылъёс быръён люкетэ потӥзы.

Чеберайёсын ужаз Ижкарысь стилист Олег Ажгихин. Солэн верамезъя, котькуд нылашлэн аслаз чеберлыкез, со понна ик конкурсэ пыриськись апай но аслэсьтыз аспӧртэмлыко туссэ яркытгес возматыны тыршыны  кулэ. «Чеберай-2010» валтӥсь нимез но вормисьлэсь короназэ Ксения Широбокова (ныл фамилиез – Воронцова) басьтӥз. Али дыре со нылкышно творчествоя «Чеберай» марафонлэн авторез но кивалтӥсез луэ.

Жаляса верано, «Чеберай» конкурс 2014-тӥ арозь гинэ улӥз. Берло аръёсы пӧртэм мугъёсъя со ӧз ортчытъяськы.

 Но кема вис карем бере, вожвылъяськон нош ик улӟиз. Быдэсак выльдӥськыса. Чеберлыкъя но устолыкъя «Чеберай» йӧскалык вожвылъяськон табере нылкышно творчествоя «Чеберай» марафон улсын ортче. «Удмурт Кенеш» огазеяськонлэн Калык творчествоя элькун юртэн огазьын дасям ӵектосэз Азьмуртлэн грантъёсыныз фондлэсь юрттэт басьтӥз. 

«Чеберай» ӵектослэн авторезлэн но кивалтӥсезлэн Ксения Широбоковалэн верамезъя, таӵе бадӟым но паськыт марафон сярысь малпан чеберлыкъя но устолыкъя «Чеберай» йӧскалык вожвылъяськонэз улӟытон вылысь кылдӥз. Ӵошатсконэ пырыськыны мылкыд карисьёс арысь аре солы гожъязы, «Чеберайлэн» улонэныз тунсыкъяськизы. Вазиськонъёс туж трос люкаськизы. Соин ик Ксения малпаз азьло аръёсы конкурсэз радъясьёсын пумиськыны. Соос ик ӵектӥзы егит нылашлы вожвылъяськонэз выльысь улӟытыны. Но конкурс ортчытон понна гинэ Ксениялэн уж борды басьтӥськемез ӧз поты. Со валаз, кулэ кыӵе ке но мукет валтӥсь малпан. Со огазеяны вожвылъяськонэ пыриськисьёсты одӥг бадӟым командае огазеяны кулэ.

Кема возьмано ӧз луы. Фондлэн юрттэменыз конкурс зэм но выль ӧре потӥз.  

Нылкышно творчествоя «Чеберай» марафон – гуртъёсын улӥсь пӧртэм ӧнерлыко, улон шоры пӧртэм сямен учкись 3 сюрслэсь ятыр нылкышноосты огазеян платформалы пӧрмиз. Со элькунысьтымы устолыко кышномуртъёслэсь быгатонлыкъёссэс калыке поттыны но азинтыны бадӟым юрттэт луэ. Уго соослэн мерлыко шуг-сектъёссы юрттӥзы ӵектосэз быдэстыны, вожвылъяськонэз улӟытыны.

2018-тӥ арын 3 сюрс удмурт нылъёс но нылкышноос пӧлын юалляськон ортчытэмын вал. Со шараяз, гутъёсын улӥсь нылкышноос, куанер улонэн, ужтэмлыкен, урод сюресъёсын пумиськыло, соослы азинскон но выль тодон-валан басьтон понна луонлыкъёссы  уг тырмо,  асьсэлэсь малпанъёссэс улонэ пыӵатыны кыӵе ке иворъёс (информация) ичи луэ. Но гуртъёсын улӥсь тросэз кышномуртъёс ваньмон дыръязы киужъёсын выро. Соин ик сыӵе быгатонлыкъёссэс шараяны, калыке поттыны кулэ. «Чеберай» ӵектос та ужез ас кияз басьтӥз.

Ӵектос улсын удмурт йӧскалык лулчеберетэз но киужез вӧлмытыны чакламын. Проект удмурт нылкышноослэсь гуртъёсын улонзэс творчество но ужбергатон пыр ӟечлыкогес карон, удмурт блогерствоез азинтон бордын тырше.

Озьыен, 2019-тӥ арын пӧсьтолэзьысен гудырикошконозь ӵектос улсын удмурт гожъяськись нылъёс понна «ИнстаЧеберай» вотэс вожвылъяськон ортчиз. Дунъясьёс бырйизы тужгес тунсыко но вольыт гожъяськись, удмурт кылэз ӟеч тодӥсь нылашез.

Марафон куинь арня ӵоже кыстӥськиз. Ужрадэ пыриськисьёс «Вконтакте» но «Инстаграм» вотэс бамъёссы пыр асьсэ сярысь, удмуртлыкен герӟаськемзы сярысь веразы, вордскем интыосынызы, йылолъёсынызы, быгатонлыкъёсынызы тодматӥзы.

Вожвылъяськонэ 60-лэсь ятыр Татарстанысь, Башкириысь, Марий Элысь, Венгриысь но Удмуртиысь гожъяськись нылашъёс но нылкышноос пыриськизы.

Дунъясьёс огкылысь нырысетӥ интыез Башкортостанын вордскем но али Ижкарын улӥсь Наталия Романовалы сётӥзы. Вожвылъяськонын кыкетӥ инты но «ИнтсаДыдыкай» ним басьтӥз Дэбес ёросысь Уйвай гуртын будэм Мария Емельянова. Куинетӥ инты но «ИнстаМусокай» ним сётӥзы Алнашысь Анастасия Васильевалы. Со сяна, радъясьёс нимысьтыз «ИнстаУстокай» нимен пусйизы Кез ёросысь «Живица» этнокомплекслэсь кузёзэ Екатерина Лекомцеваез. Озьы ик пусйизы мыло-кыдо удмурт анайёсты. «ИнстаАнай» ним Алнашысь Екатерина Русаева, Ижкарысь Наталья Образцова но Надежда Жуйкова  басьтӥзы.

Со аре ик куарусён толэзе «Чеберай» марафонлэн кыкетӥ люкетэз кутскиз. Элькунысь 25 ёросъёсысь лулчеберетъя юртъёсын «Женское творчество. Бизнес и блогерство» темая мастер-классъёс ортчизы. Дышетонъя форумъёсты бизнес-тренеръёс, блогеръёс, стилистъёс нуизы. Соос ужбергатон, блогерство но туала удмурт мода сярысь вераськизы. Спикеръёс хоббиез ужбергатонлы пӧрмытыны дышетӥзы, ужбергатон удысын кылдэм шуг-секытъёс сярысь мадизы но отысь капчиен потон понна дэмланъёс сётӥзы. Озьы ик веразы, кызьыы вотэс бам пыр коньдон поттыны луэ но мар со понна лэсьтыны кулэ. Со сяна марафонэ пыриськисьёслы шонер дӥсь бырйыны юрттӥзы, мугорез йӧно возьыны но ӝужыт пыдберо катаосын чебер ветлыны дышетӥзы. Озьы ик соос психологен но астролэген пумиськылӥзы.

Котькуд ёросын марафон улсын чеберлыкъя но устолыкъя «Чеберай» йӧскалык вожвылъяськонэ быръён люкетъёс ортчылӥзы. Кастинге пыриськись апайёс пӧртэм ӵошатсконъёсын нюръяськизы. Жюриысь ёзчиос соослэсь кибашлы луэмзэс учкизы, удмурт лулчеберетэз но историез тодэмзэс эскеризы, визьзэс сыназы, сцена вылын модалиос кадь ветлэмзэс дунъязы. Котькуд ёросын вожвылъяськонэ 10 нылашъёс но нылкышноос пыриськизы.  Соос арлыдзыя куинь группалы люкемын вал: 18-35 арес, 35-55 арес, 55 но солэсь трос. Вормисьёсты котькуд группаын бырйизы.

«Чеберай 2020» быръён люкетаз элькунысьтымы вань ёросъёсысь оглом 250 нылъёс но нылкышноос пыриськизы. Соос пӧлысь 72-ез полуфиналэ потӥзы. Собере ини конкурслэн кыкетӥ люкетаз, смс-гожтэтъёсын куара сётыса, 20-ез финалэ выжизы.

Пусйыны кулэ, нылкышно устолыкъя марафон ортчем бере, ужрадлэн сайтаз cheberai.ru «Чеберай» клуб усьтыны чакламын.  Со нылкышноосты огазеян, огъя малпанъёсты быдэстон понна радъяськоз. Сайтлэн бамез тодон-валан басьтон площадка но нылкышно киужъёсты реклама чотын возьматон (место для рекламы) инты луоз. Озьы ик проект улсын удмурт модалиос понна йӧскалык школа ужзэ мытоз.

 
24 ар куспын чеберлыкъя элькун конкурсын 8 удмурт нылашъёс вормылӥзы.

1.“Чеберина -1995” – Наталья Кашинина, Шаркан ёрос.
2.“Чеберина-1998”  – Алёна Фёдорова, Якшур-Бӧдья ёрос.
3.“Чеберина-2000” — Елена Дюкина, Яр ёрос.
4.“Чеберина-2002” — Наталья Петрова, Шаркан ёрос.
5.“Чеберина-2006” — Надежда Яковлева, Пичи Пурга ёрос.
6.“Чеберай-2010 луиз шаркан ныл — Ксения Воронцова, Шаркан ёрос.
7.“Чеберай-2012” – Олеся Полатова, Татарстанысь Кукмор ёрос.
8.“Чеберай-2014” – Анастасия Тутаева, Дэбес ёрос.

Кыӵе ёросысь чеберай та списокез узырмытоз – тодом шуркынмон толэзе. Соку “Чеберай” вожвылъяськонлэн финалэз ортчоз.